男生圍：基仔跳槽暗戰敵友難分

基仔現在成為英皇一哥，對未來事業發展信心十足。
攝影：林德雄
髮型： Mark Ip of Hair Salon
服裝： YSL
場地： THE PANTRAY

一朝天子一朝臣，古巨基的登基記腥風血雨。金牌大風洗牌，盛傳太子鄭中基權傾朝野，當家黃栢高（ Paco）退位，其黨羽、金牌最強的古巨基轉投英皇，仍在位的英皇一哥謝霆鋒則會自立門戶。兩大陣營大執位，古巨基一夜間受盡千夫指，曾請他飲喜酒的梁漢文回應兩人唔熟，太子基紅了眼批鬥，陳輝虹助陣捽死你，反骨、衰仔、虛偽之聲此起彼落。入行 18年，古巨基第三度嘗人情冷暖，是非未算小兒科，心情並不好受。「做朋友講緣份」，古巨基說。不過有些人，再見已不是朋友。　撰文：朱倬誼

金牌大風上月政變，話事人黃栢高被合作多年的夥伴鄭東漢調離經理人部門及唱片部，發放邊疆開拓無人地帶電影部，由被指為掛名 CEO的陳輝虹走馬上任，太子鄭中基垂簾聽政。追隨 Paco的主將古巨基以迅雷之姿投靠英皇，抉擇天才定白癡，佢知我唔知。

跟鄭中基情淡如水

據聞金牌發生人事變動前，基仔已口頭答應 Paco留低效力，基仔不置可否回應「總之好正面」，他說：「 Paco被安排離開咗佢呢兩個大家最推崇嘅崗位，係好可惜，我咁多年嚟都係同 Paco對口嘅，所以呢個亦係我最主要離開金牌嘅原因，但我同 Paco依然關係好好，係好朋友。」雙方合作 6年，基仔對伯樂有讚冇彈：「佢係一個無論遇到乜嘢事都好積極嘅人，唔放棄嘅，相信只要下決心一定做到。當然一方面都係做生意，但另一方面佢對同事好用情。」
基仔一走，鄭中基和陳輝虹雙劍合璧狂插他不續約搞新聞，梁漢文（梁炳）及後加入戰圈，揚言與基仔不熟，但實情他去年請過基仔飲結婚酒， 05年基仔開紅館個唱時也請過梁炳做嘉賓，更在台上透露彼此是打機密友，現在的梁炳卻劃清界線，基仔說：「所有言語上嘅糾纏到此為止，我有個新開始，希望大家都工作愉快。」和梁炳是否仍是朋友？基仔謂：「呢個圈尤其係香港，大家成日朝見口晚見面，順其自然啦，朋友係講緣份嘅。」跟鄭中基的關係又如何？「以前大家同事囉，因為冇乜機會一齊聚會，見面都係春茗、團拜、尾禡。」
基仔跳槽受盡千夫所指，向來新聞淡如水的他忽爾迎接入行以來最大是非，他卻笑說：「我其實好少上 C1㗎，但係還好，我做咗 18年半，都經歷幾多嘢。今次呢件事，特別係新聞炒得最犀利嗰幾日，心情梗係唔好受，因為好多嘢我知道但係我唔可以講，如果講咗就演變成真正嘅罵戰，我有好多實質證據可以為自己辯護，但一定口同鼻拗，冇意思㗎。」


Paco（左）和基仔合作 6年，結果也是合久必分。　資料圖片


基仔（左） 06年擔任鄭中基（中）演唱會嘉賓，沒料到雙基不和，連梁漢文（右）也謂跟基仔不熟。　資料圖片

基仔續說：「我一個答案答晒，我了解每一個人有每一個崗位，因為崗位要你做某啲嘢，所以我冇怪任何人，唔會因為呢件事睇到邊啲唔係朋友，我唔會咁諗；反而睇到邊啲係朋友，側田、小方（方力申）、小肥，咁咪正面啲囉。有好多朋友仲喺舊公司工作，同埋受薪吖嘛，我好明白佢哋嘅處境，所以無論有乜嘢所謂回應，我明白㗎，在心中啦。」

體諒友人難言之隱


楊受成為基仔在澳門舉行加盟英皇記者會，還出動私人飛機以示隆重。　資料圖片

出道 18年，今次是非確屬基仔人生中的一大衝擊，其實過往他曾兩度陷低潮，人情冷暖試勻。 95年他擔任無綫《娛樂新聞眼》時獲賞識進軍樂壇，後因合約問題被無綫雪藏； 02年他返內地拍攝瓊瑤作品《還珠格格 III之天上人間》，香港人氣插水，唱片真空期，女星送上白鴿眼，勁難頂。
「 95年我喺 TVB，又係唔識 handle合約，嗰時細蚊仔嚟之嘛，因為續約問題雪咗一年。另一次最低落係拍完《還珠》之後，有幾個月冇唱片合約，因為我真係鍾意唱歌，係有冇得繼續唱歌嗰種心情。好啦，戲又拍完，咁又點呢？同埋返到嚟呢個我演藝圈成長嘅地方，好似唔屬於呢度咁，好唔舒服。」

受白鴿眼嘗盡冷暖


一講感情話題，基仔即時笑咪咪耍太極。

基仔續說：「其實兩次低潮都遇到所謂嘅人情冷暖，嗰啲係好翳嘅，啲人嘅嘴臉同說話，『返嚟邊度掂㗎？』有次喺個記者會，遇到個幾 friend嘅女藝人，同個記者喺隔籬，我行埋去講拜拜，佢當唔識我，反而隔籬個記者仲會講拜拜。嗰時我啱啱返嚟香港，嗰個年代啲人會覺得你返內地係唔掂，我做得唔好先要去，唔係家嘅心態，開埋另外嘅市場勁喎。跟住有時自己出席活動會靜啲，我好似新嚟，周圍嘅人唔認識，會低調啲囉，適應期要花時間，不過都唔緊要啦，過咗去啦，人情冷暖亦唔係得冷，都有暖嘅。」

想結婚時就結婚

pic:基仔和緋聞女友 Lorraine相處 15年，至今依然情不變。　《忽然 1周》圖片

情況是這樣的，訪問古巨基當日，他的緋聞女友兼得力助手 Lorraine也在場。講到感情狀況，問基仔是否需要 Lorraine迴避？他笑：「唔使。」女的講電話，自動閃開。為基仔擋風擋雨 15年，人前強悍的 Lorraine其實都有小女人的時候。

女友至親統統低調

基仔因轉會備受千夫所指，令他再嘗人情冷暖。

快將 37歲的基仔已屆適婚之年，但他說：「仲細，大個啲先啦。」基仔超鍾意小朋友，個個贊成有仔趁嫩生，他卻不以為然：「超鍾意同擁有自己嘅兒女，心理準備同調整好緊要，你閒時同細蚊仔玩同真係培育係兩種喎。」他簽約英皇三年，那麼 40歲前結婚無望？他倒說：「好難講，想嘅時候咪做囉，唔使一定有好計劃。」

今年初基仔勇奪《勁歌金曲》最受歡迎男歌星，他在台上喊到變豬頭炳，提到 Lorraine時，全世界等他發表愛的宣言，殊不知只是一句多謝，唓！基仔哈哈笑：「唓乜啫？起晒題啦。」他對感情問題一味 hea：「我不嬲嘅原則係唔講太多呢方面，咁會分散咗，另一個角度係私人嘢，無論以前家將來，我嘅感情事都會好低調。」

人家一個女子等足 15年也沒名份，基仔笑問：「乜名份啫？」兩人拍拖早已是公開秘密，公開有何不可？「真係低調㗎，家都成日俾人影……」此時，行開良久的 Lorraine歸位，基仔看着她說：「講緊你喎。」她問：「講緊乜呀？」基仔突然對記者說：「總之我嘅感情事比較低調，同我一齊嘅人一定都係咁嘅性格，同性格嘅人會聚埋。打個比喻，我屋企人即使睇我嘅騷、睇我嘅活動都係靜雞雞，唔會特別坐 VIP位，『怕乜啫？阿爸阿媽之嘛，好多藝人都係咁㗎啦！』但冇得解，個人喜好，佢哋鍾意低調唔想見報。」

自認專情獨沽一味

基仔今年初奪《勁歌》最受歡迎男歌星時，聲淚俱下，可惜並沒發表愛的宣言。　資料圖片

Lorraine 又湊巧地講電話行開。續啄基仔，跟她一起工作， Lorraine在身邊，怎樣低調？「所以佢咪我嘅得力助手囉。」唔爭在一句半句認拍拖啦，他大笑：「做乜你哋咁囉囉攣啫？呢一刻嘅我感情上都係低調，隨住年紀大心態會變，可能唔知到咗乜嘢年紀想成家立室。」

不計 Lorraine，近 10年基仔的緋聞名單只得一個鄧麗欣，他倒算專情。「你睇我打機就知啦，打極都係一個 game（ Winning Eleven）。」至於有沒有飛來蜢，基仔說：「咁又冇，可能我畀人感覺，係好 nice嘅朋友，你點樣畀人嘅感覺都好緊要。」此言擺明贈那個她定心丸，基仔又笑：「邊個？」他講感情講到聲都冇埋，只顧着啜飲品，然後借尿遁。「我急呀，真急㗎，唔係想避呀。」你信唔信吖？